Dkt.Mpango:Waziri Mkuu Mstaafu Hayati Edward Lowassa alikuwa mwanamazingira

NA MWANDISHI WETU

MAKAMU wa Rais wa Jamhuri ya Muungano wa Tanzania Dkt. Philip Mpango amewaongoza viongozi na wananchi katika kutoa heshima za mwisho kwa Waziri Mkuu Mstaafu hayati Edward Ngoyai Lowassa katika viwanja vya Karimjee Jijini Dar es salaam.

Makamu wa Rais amesema  Lowassa alikuwa mwanamazingira hodari ambapo katika wadhifa wake wa  Waziri wa Nchi – Ofisi ya Makamu wa Rais na alipokuwa Waziri Mkuu wa Jamhuri ya Muungano wa Tanzania alihimiza sana uhifadhi na Utunzaji wa mazingira na aliongoza kampeni nyingi za upandaji miti na usafi wa mazingira.

Akitoa salamu za pole kwa niaba ya Rais wa Jamhuri ya Muungano wa Tanzania Dkt. Samia Suluhu Hassan Februari 13,2024, Makamu wa Rais ametoa pole kwa familia, ndugu, marafiki pamoja na watanzania wote kwa ujumla kufuatia msiba huo mkubwa kwa Taifa.

Amesema mchango wake huo uwakumbushe watanzania wote wajibu wa msingi wa kulinda na kutunza mazingira na hususan vyanzo vya maji ili kukabiliana na athari za mabadiliko ya tabianchi ambazo zinaendelea kuleta madhara mengi katika Taifa na dunia kwa ujumla.

”Serikali inathamini uzalendo na mchango mkubwa aliyoutoa Hayati Edward Lowassa katika maendeleo ya nchi kwa kuwa alijitolea kwa dhati kulitumikia Taifa pamoja na kutumia vema karama alizojaliwa na Mwenyezi Mungu kuwatumikia Watanzania katika nyadhifa mbalimbali alizowahi kushika.

”Ni muhimu kila mmoja mtanzania kujikumbusha wajibu aliyonao kwa taifa na kuyaishi kwa vitendo mambo yote mazuri yanayotokana na maisha ya hayati Lowassa.

”Ni vema Watanzania kumuenzi hayati Lowassa kwa kuendelea kuchapa kazi ili kuboresha maisha na hivyo kuchangia katika ujenzi wa Taifa kwa kuwa alikuwa mchapa kazi hodari katika utumishi wa umma na katika shughuli zake binafsi ikiwemo ufugaji”ameongeza Dkt.Mpango

Aidha Makamu wa Rais ametoa wito kwa watanzania wote na hususan vijana kumuenzi  hayati Lowassa kwa kutumia fursa mbalimbali kujipatia elimu kwa manufaa ya Taifa kwa kuwa alikua kinara katika elimu na kusimamia kwa uhodari  utekelezaji wa sera, mikakati na mipango mbalimbali ya elimu hususan ujenzi wa shule za Sekondari kila Kata..

Makamu wa Rais amewasihi watanzania kutumia msiba huo kudumisha na kuimarisha upendo, amani na mshikamano wa Taifa.