Watafiti sekta ya uvuvi watakiwa kuibua fursa

NA MWANDISHI WETU

NAIBU Waziri wa Mifugo na Uvuvi, Abdallah Ulega amewataka watafiti katika Sekta ya Uvuvi kujikita katika kuibua fursa zinazopatikana kwenye uchumi wa buluu ili ziweze kuvutia wawekezaji na kuinufaisha jamii.

Ulega ameyasema hayo katika Mkutano wa Mwaka wa Kisayansi uliowakutanisha watafiti mbalimbali wa masuala ya uvuvi uliofanyika jijini Dar es Salaam jana.

Amesema kuwa baharini kuna mazao mbalimbali ambayo yanaweza kusaidia jamii kupata kipato na kuvutia uwekezaji mkubwa.

“Dunia kwa sasa inaelekea kwenye uchumi wa buluu, kuhakikisha rasilimali maji zinatumika ipasavyo kwenye kumsaidia mwanadamu na watafiti wana nafasi kubwa kwa sababu  kupitia tafiti zao wanaweza kuibua fursa na changamoto zilizopo katika eneo hilo ’’amesema Ulega

Aidha Ulega ameongeza kuwa  watafiti ni muhimu wakatumia taaluma zao kwa kushirikisha jamii inayonufaika na tafiti wanazofanya ili  kuweza kuionesha dunia fursa zilizopo kwenye sekta ya uvuvi kwa lengo la kuvutia wawekezaji wengi zaidi.

“Upande wa baharini tuna  Mwani, Majongoo bahari na Kaa, upande wa maziwa tuna  Sato, Sangara na Dagaa, haya yote ni mazao na yakielezwa vizuri na uwekezaji ukapatikana itainua uchumi wa watu wetu,” amebainisha Ulega

“Watafiti wakiibua fursa hizo na kuvutia wawekezaji itakuwa inaenda sambamba na malengo na nia ya Rais Samia Suluhu Hassan ya kualika uwekezaji kwenye sekta mbalimbali ikiwemo sekta ya uvuvi kwa maendeleo ya nchi na Taifa kwa ujumla.

Mkutano huo wa Mwaka wa Kisayansi  unafanyika kwa siku tatu kuanzia Julai 12 hadi 14 na  umekutanisha watafiti wa masuala ya uvuvi kutoka ndani na nje ya nchi kwa lengo la kujadiliana na kubadilishana mawazo juu ya namna ya kufanya ili uchumi wa buluu hasa upande wa sekta ya uvuvi kuwa endelevu.