Magonjwa yatajwa chanzo cha Mbwamwitu kutoweka

NA MIRIAM SARAKIKYA, ARUSHA

SERIKALI kupitia Taasisi  ya  Utafiti  Wanyamapori  Tanzania (TAWIRI)  na Hifadhi za Taifa Tanzania TANAPA)  zinaendelea  na zoezi endelevu la kuwarejesha Mbwa mwitu ndani  ya Hifadhi ya Taifa ya Serengeti ikiwa ni kuhakikisha kuwa wanyamapori hao wanaendelea kuhifadhiwa katika mfumo _wa ikolojia_  ya Serengeti.

Hayo yamezungumzwa jijini  Arusha Agosti 29,2023 na Mtafiti Mkuu na Mkurugenzi wa Kituo cha Utafiti Serengeti Dkt. Emmanuel Masenga wakati wa zoezi la kuwapokea Mbwamwitu zaidi ya  20  waliotoka Hifadhi ya Taifa Mkomazi na kuhamishiwa  katika Hifadhi ya Taifa Serengeti kabla ya kuachiwa huru.

Dkt.Masenga amesema kuwa matokeo ya tafiti yanaonyesha kuwa sababu kuu za kutoweka kwa Mbwamwitu katika Hifadhi ya Serengeti ni magonjwa (Rabies and Canine Distemper Virus) na ongezeko la idadi ya Simba na Fisi ikiwemo kuuawa na wananchi wanapotoka nje ya hifadhi.

Aidha, Dkt. Masenga  amesema jitihada za Serikali  za kuwarejesha wanyamapori hao ndani ya Hifadhi ya Taifa Serengeti ni zoezi endelevu na lilianza tangu mwaka 2011 kwa lengo la kuwahifadhi  ili kutunza bioanuwai na kuendeleza utalii.

Dkt. Masenga  amebainisha kuwa kama inavyofahamika jukumu kubwa la Taasisi  ya  Utafiti  Wanyamapori  Tanzania (TAWIRI) ni kufanya  tafiti  za wanyamapori, hivyo TAWIRI  inaendelea kufanya tafiti za kina za kuhakikisha Mbwamwitu wanaendelea kuhifadhiwa katika mfumo ikolojia wa Serengeti