Matumizi ya baruti yafikia tani 26.5 mwaka 2024

NA MWANDISHI WETU,DODOMA

MATUMIZI ya Baruti  nchini yameongezeka kutoka  tani 3,000 kwa  mwaka katika miaka ya 1990 hadi kufikia wastani wa tani 26,516.07 kwa mwaka 2024.

Mbali na hilo lakini pia hadi sasa kuna zaidi ya bohari (magazine) 231, stoo 493, masanduku ya kuhifadhia baruti zaidi ya 279 yaliyosajiliwa kwa ajili ya kutunzia baruti migodini na maeneo ya biashara ya baruti.

Takwimu hizo zimetolewa Januari 13, 2025 jijini Dodoma na Kaimu Katibu Mtendaji wa Tume ya Madini, Mhandisi Ramadhani Lwamo  wakati akifungua kikao cha kuwajengea uwezo  wakaguzi migodi na baruti.

Amesema, kutokana na ongezeko la shughuli za uchimbaji wa madini, utafiti wa mafuta na gesi asilia na ujenzi wa miundombinu mbalimbali, kuongezeka kwa matumizi hayo pia kumepelekea kupanuka kwa biashara ya baruti hapa nchini.

“Matumizi makubwa ya baruti maana yake uchimbaji umeongezeka, hivyo bila udhibiti italeta madhara, kikao hiki ni kujengeana uwezo na lengo ni kuhakikisha wachimbaji hawapotezi maisha au kupoteza viungo kwa ajili ya matumizi ya baruti.

“Ongezeko la uhitaji wa matumizi ya baruti hapa nchini kumepelekea uwepo wa changamoto kadhaa katika usimamizi wake, udhibiti madhubuti ni muhimu, mkadhibiti katika maeneo yenu, itakuwa ni aibu mkaguzi mgodi na baruti eneo lake mtu akapata madhara,”amesema Mhandisi Lwamo .

Mhandisi Lwamo amebainisha kuwa,mpaka sasa kuna zaidi ya bohari (magazine) 231, stoo 493, masanduku ya kuhifadhia baruti zaidi ya 279 yaliyosajiliwa kwa ajili ya kutunzia baruti migodini na maeneo ya biashara ya baruti.

Kwa upande wake Kaimu Mkurugenzi wa Ukaguzi Migodi na Mazingira, Hamisi Kamando amesema kumekuwa na matukio mbalimbali ya ajali yanayotokana na kutokuzingatiwa kwa Sheria ya Baruti ya Mwaka 1963, Kanuni za Baruti za Mwaka 1964 na taratibu zingine katika usimamizi wa Baruti.

Naye, Mwanasheria kutoka Tume ya Madini  Damian Kaseko amewataka wakaguzi migodi na baruti kusimamia Sheria, Kanuni na Sera wanapotekeleza majukumu yao ili kuepusha migogoro na kuwa na mipaka katika utekelezaji wa shughuli zao.