Joto lauwa watu 500 Uhispania

MADRID UHISPANIA,

WAZIRI Mkuu wa Uhispania Pedro Sanchez amesema zaidi ya watu 500 wamepoteza maisha nchini humo wakati wa wimbi la joto la siku 10 huku bara lote la Ulaya likiendelea kupata hasara kubwa kutokana na joto kali ambalo limevunja rekodi mwaka huu.

Kwa mujibu wa Shirika la habari la Pars.limemnukuu Sanchez jana akisema kuwa  hali hivi sasa ni ya hatari na kuongeza kuwa mabadiliko ya tabianchi ni ukweli ambao hauwezi kupingika huku akiwahimiza wananchi kuchukua tahadhari.

Sanchez amesema takwimu hizo za waliopoteza maisha zimewasilishwa na Taasisi ya Afya ya Carlos III ambayo inakadiria idadi ya vifo vinavyotokana na joto itaongezeka mwaka huu ikilinganishwa na miaka iliyopita.

Nyuzijoto katika baadhi ya maeneo ya Uhispania ni zaidi ya 45 na joto hilo limepelekea misitu kuteketea moto.

Nchini Uingereza  joto pia limeongezeka mwaka huu na kuvunja rekodi  ambapo mashariki mwa Uingereza kumeripotiwa nyuzi joto  40.3C na hivyo kupita kiwango cha juu cha hapo awali mnamo 2019.

Kaskazini mwa Ureno, rubani alifariki wakati ndege yake ya kusaidia shughuli za zima moto ilipoanguka katika eneo la Foz Coa, karibu na mpaka wa Uhispania.

Mamlaka ya Ureno inasema takriban watu 238 wamekufa kutokana na joto hilo kali katika wiki iliyopita.

Kwa sasa joto duniani limeongezeka kwa takriban nyuzi joto 1.1C tangu enzi ya viwanda ianze na halijoto itaendelea kuongezeka kama serikali kote ulimwenguni hazitafanya juhudi za kupunguza kiwango cha uzalishaji wa kaboni.